ഹിന്ദുത്വസെക്കുലറുകളെ തിരിച്ചറിയുന്നതെങ്ങനെ?

താഴെ പറയുന്നവ മൊത്തമായോ ചില്ലറയായോ വിശ്വസിക്കുന്നവരാണ് ഹിന്ദുത്വസെക്കുലറുകള്‍:

ഖുര്‍ആന്‍

1. ഖുര്‍ആന്‍ തന്നെയാണ് പ്രശ്‌നഹേതു. ആക്രമണത്തിനു പ്രേരിപ്പിക്കുന്ന നിരവധി ഘടകങ്ങള്‍ അതിലുണ്ട്.

ദേശീയത

1. ഒരു 'യഥാര്‍ത്ഥ' ഇസ്ലാമിക വിശ്വാസിക്ക് ഇന്ത്യന്‍ ദേശീയതയില്‍ വിശ്വസിക്കാന്‍ സാധ്യമല്ല. അവര്‍ അത് പുറമേയ്ക്കു പറയാറില്ലെങ്കിലും. 
2. മതം പ്രചരിപ്പിക്കുന്നത് മതമൗലികവാദവും വര്‍ഗീയതയുമാണ്. മതംമാറ്റം ഒരു കുറ്റകൃത്യമാണ്, ദേശദ്രോഹവുമാണ്. 
3. ഇസ്ലാം മതത്തില്‍ പെട്ടവര്‍ ലോകത്ത് എവിടെയും നടത്തുന്ന അതിക്രമങ്ങള്‍ക്ക് ഇന്ത്യന്‍ മുസ്ലിങ്ങളും മറുപടി പറയണം.

മതമൗലികവാദവും വര്‍ഗീയതയും

1. ഇന്ത്യയില്‍ മുസ്ലിങ്ങള്‍ക്കെതിരെ അതിക്രമങ്ങള്‍ നടക്കുന്നുണ്ടെങ്കിലും മതസ്വത്വങ്ങള്‍ സംഘടിച്ച് അതിനെതിരെ പ്രതികരിക്കുന്നത് ശരിയല്ല. അങ്ങനെ ചെയ്താല്‍ അത് മതമൗലികവാദമാണ്, വര്‍ഗീയതയാണ്. 
2. മതമൗലികവാദവും വര്‍ഗീയതയും തമ്മിലുള്ള വ്യത്യാസം ലോലമാണ്. മതമൗലികവാദികളായ മുസ്ലിങ്ങള്‍ വര്‍ഗീയവാദികളുമാണ്. 
3. മതാനുഷ്ഠാനങ്ങളില്‍ തീവ്രമായി മുഴുകുന്നത് മതമൗലികവാദമാണ്.
4. മുസ്ലിങ്ങള്‍ മതമൗലികവാദം കൂടുതലുള്ളവരാണ്, ഹിന്ദുക്കള്‍ പൊതുവേ ലിബറലുകളാണ്. 
5. ജാറം, റാത്തീബ്, ചന്ദനക്കുടം, നേര്‍ച്ചകള്‍ എന്നിവയില്‍ വിശ്വസിക്കുന്ന മുസ്ലിങ്ങള്‍ മറ്റുള്ളവരെ അപേക്ഷിച്ച് ലിബറലുകളാണ്. അവരില്‍ തീവ്രചിന്താഗതിക്കാര്‍ കുറവ്. 
6. ജാറം, റാത്തീബ്, ചന്ദനക്കുടം, നേര്‍ച്ചകള്‍ എന്നിവയെ ഇസ്ലാമികവിരുദ്ധമായി കാണുന്നവരും അത് പ്രചരിപ്പിക്കുന്നവരും മതമൗലികവാദികളാണ്. 
7. ഇസ്ലാംമതപരിഷ്‌കരണത്തിന്റെ കാലം കഴിഞ്ഞു. മതപരിഷ്‌കരണത്തിനു വേണ്ടി വാദിക്കുന്നവരും മതമൗലികവാദികളില്‍ പെടും. 
8. ന്യൂനപക്ഷവര്‍ഗീയതയും ഭൂരിപക്ഷവര്‍ഗീയതയും സമമാണ്. 
9. മുസ്ലിങ്ങള്‍ക്കിടയിലുള്ള വര്‍ഗീയതയാണ് ഹിന്ദുത്വവര്‍ഗീയതയ്ക്ക് കളമൊരുക്കുന്നത്.
10. മുസ്ലിങ്ങള്‍ ന്യൂനപക്ഷമായിരുന്നിടത്ത് അവര്‍ മനുഷ്യാവകാശത്തെ കുറിച്ച് പറയുകയും ഭൂരിപക്ഷമായിടത്ത് മനുഷ്യാവകാശം കവരുകയും ചെയ്യും. 
11. ഇടതു/ വലതു മുഖ്യധാരാരാഷ്ട്രീയത്തിന്റെ ഭാഗമാവാത്തവര്‍ ഹിന്ദുത്വത്തെ സഹായിക്കുന്നവരാണ്.

മുസ്ലിംസ്വത്വം 

1. മുസ്ലിങ്ങള്‍ ഒറ്റ ജനവിഭാഗമാണ്. അവര്‍ക്കിടയിലെ തരംതിരിവുകള്‍ പ്രസക്തമല്ല. 
2. ആഗോളമുസ്ലിം സമൂഹം ഒരു സങ്കല്‍പ്പം മാത്രമല്ല, കേന്ദ്രീകൃതമായ രൂപഘടനയോടുകൂടിയ ഒരു യാഥാര്‍ത്ഥ്യവുമാണ്. (ഉദാ: ഇന്ത്യയിലെ മുസ്ലിങ്ങളും സൗദിയിലെ മുസ്ലിങ്ങളും ഒന്നാണ്. ഇന്ത്യയില്‍ സ്വാതന്ത്ര്യം ആവശ്യപ്പെടുന്ന ഇതേ മുസ്ലിം, സൗദിയില്‍ അത് ഹനിക്കുന്നു)
3. മുസ്ലിങ്ങള്‍ എല്ലാവരും കുഴപ്പക്കാരാണെന്ന് കരുതുന്നില്ല. എങ്കിലും ചിലര്‍ കുഴപ്പക്കാരാണ്. മറ്റു മുസ്ലിങ്ങള്‍ അവര്‍ക്കെതിരെ നിലപാടെടുത്തുകൊണ്ട് മതേതരത്വത്തെ ഉയര്‍ത്തിപ്പിടിക്കണം. 
4. മതത്തിന്റെ ഭാഷയില്‍ സംസാരിക്കുന്ന മുസ്ലിംസംഘടനകള്‍ സെക്കുലറിസത്തെ തകര്‍ക്കുന്നുവയാണ്.

മുസ്ലിംസ്ത്രീ

1. മുസ്ലിംസ്ത്രീ മുസ്ലിംപുരുഷന്റെ അടിമയാണ്. 
2. മുസ്ലിംസ്ത്രീകള്‍ക്ക് 'മതമൗലികവാദി'/'വര്‍ഗീയവാദി'കളാവാന്‍ സാധ്യമല്ല. 
3. പര്‍ദ്ദ ധരിച്ച മുസ്ലിംസ്ത്രീകളെല്ലാം സ്വന്തം അഭിപ്രായമില്ലാത്തവരാണ്.

മുസ്ലിംസ്വഭാവം

1. പല മുസ്ലിം സംഘടനകളും പുരോഗമനപക്ഷമായി ഭാവിക്കാറുണ്ട്. അതുപക്ഷേ, ബോധ്യങ്ങളുടെ അടിസ്ഥാനത്തിലല്ല, ഒരു മുഖംമൂടി മാത്രമാണ്. 
2. ഇസ്ലാമിസ്റ്റുകള്‍ അഭിപ്രായങ്ങള്‍ പുനപ്പരിശോധിക്കുകയില്ല. അങ്ങനെ ചെയ്യുന്നുണ്ടെങ്കില്‍ അത് തല്‍ക്കാലത്തേയ്ക്ക് മാത്രം. 
3. മുസ്ലിങ്ങള്‍ പെട്ടെന്നു പൊട്ടിത്തെറിക്കുന്ന സ്വഭാവക്കാരാണ്. ലിബറലുകളുമല്ല. 
4. മുസ്ലിങ്ങള്‍ക്ക് മതവിഷയങ്ങളില്‍ മാത്രമേ താല്‍പ്പര്യമുള്ളൂ. 
5. മുസ്ലിങ്ങള്‍ക്കിടയില്‍ കുറ്റകൃത്യങ്ങള്‍ കൂടുതലാണ്. 
6. എല്ലാ ഇസ്ലാമിസ്റ്റുകളും ഫ്യൂഡല്‍ ചിന്തയുള്ളവരും സ്ത്രീവിരുദ്ധരുമാണ്. 
7. മക്കളുടെ സ്വാതന്ത്ര്യത്തെ ഹനിക്കുന്ന മുസ്ലിം മാതാപിതാക്കള്‍ യാഥാസ്ഥിതികര്‍ മാത്രമല്ല, മതമൗലികവാദികളുമാണ്. 
8. എല്ലാ ഇസ്ലാമിസ്റ്റുകളും മതവാദികളും സൗദിപക്ഷപാതികളാണ്.

ശരിഅത്ത്

1. ശരിഅത്തിനു വേണ്ടി വാദിക്കുന്ന മുസ്ലിം സംഘടനകള്‍ ശൈശവവിവാഹത്തെ പ്രോത്സാഹിപ്പിക്കുന്നവരാണ്.
2. ശരിഅത്തിനു വേണ്ടി വാദിക്കുന്ന മുസ്ലിംസംഘടനകള്‍ മുത്തലാക്കിനെ പ്രേത്സാഹിപ്പിക്കുന്നവരാണ്.
3. ശരിഅത്തിനു വേണ്ടി വാദിക്കുന്ന മുസ്ലിംസംഘടനകളെല്ലാം പര്‍ദ്ദ നിര്‍ബന്ധമായും ധരിക്കണമെന്നു പറയുന്നവരാണ്. 
4. ഹിന്ദുചിഹ്നങ്ങള്‍ സെക്കുലര്‍ ചിഹ്നങ്ങളുമാണ്. അത് മാറ്റി നിര്‍ത്തുന്നവര്‍ വര്‍ഗീയവാദികളാണ്.